mercredi 3 février 2010

Kawm Lub Neej Npluamag

Kuv nrug rua cov tsaavxwm HKTF zoo sab kws muaj cov txivtsev coob leej tau txavtxim sab kawm phoo ntawv lub neej npluamag. Kuv xaav hastas yuav yog ib theem kws yoojyim rua suavdlawg heev yog muab pev rua suavdlawg txujkev txawj ntse.

Tabsis ntshai muaj coob leej tub tsi tau kawm phoo ntawv nuav hab, qhov kws peb yuav moog qha tau Vaajtswv rua lwm tug, yuavtsum yog peb nyam kawm tej ntaub ntawv txhua yaam kws has txug peb txuj kev ntseeg, peb txha paub pav rua lwm tug. Txawm yuav yog ib qhov yoojyim los peb yuav tau xaav txug tug kws tsi tau kawm dlua ib zag le, puab yuav ua lecaag paub?

Peb xob xaav txug peb xwb, tabsis xaav txug pawg ntseeg coob leej tseem tsi tau paub yuav pav tau tswv Yexus zaaj rua lwm tug. Thaus peb kawm paub lawm, peb tsua coj moog qha rua txhua tug tswvcuab kuas puab paub ua timkhawv txug Tswv Yexus hab.

Taag nrho cov txiv tsev kws sau npe kawm muaj txug 38 leej hab 4 leeg quaspuj. Cov pawg txivtsev kws sau npe kawm yog: Alençon 8 tug txivtsev 1 leeg quaspuj, Nantes 12 leeg txivtsev, Arles 1 leeg txivtsev 1 leeg quaspuj, Caen 2 leeg txivtsev, Lyon 4 leeg txivtsev 1 leeg quaspuj , Tours 2 leeg txivtsev 1 leeg quaspuj, Troyes 4 leeg txivtsev, Rennes 5 leeg txivtsev.

Tseem tshuav 4 pawg pawg ntseeg tsi pum puab teb rua kuv, tsi paub tas sov puab puas kawm. Kuv thov nquahu kuas peb txhua tug kawm, yog hastas tsi muaj chaw khuamcheem tag-tag. Tej zag peb xaav hastas tug nqe kim heev, tabsis yaam kws yug them ib tug nqe lawm, qhov ntawd yuav muaj nujnqes heev.

Has rua mej cov pawg txivtsev kws tau sau npe kawm lawm, mej yijmeem muab sab rau kawm kuas kawg. Kuv yuav teem caij tuaj ntsib mej thaus mej kawm taag 15 zaaj lawm. Kuv maam coj phoo ntawv tuaj rua mej.

Yog mej muaj tej qhov kws tsi totaub los hu xuvtooj moog nug kuv; 06 64 70 21 89 kuv txaus sab yuav teb mej txhua sijhawm. Cov pawg txivtsev kws tsi tau sau npe kawm los yog thaus twg mej npaaj kawm ces qha rua kuv paub, kuv maam xaa ntaub ntawv tuaj rua mej.
Dlejnum lug ntawm HKTF, tabsis cov quaspuj xaav kawm los yeej kawm tau, tsi yog cov txivtsev ua Vaajtswv dlejnum xwb, peb txhua tug muaj feem kawm, muaj feem yuav ua Vaajtswv dlejnum tuab yaam, yog leej twg nrhav ces nwg yuav ntsib.

Kl. Txooj Neeb

Pawg Txivtsev Arles


Nub tim 16-17/01/10 kuv tau moog saib cov txivtsev nyob Arles, hab muaj caij tau qha kev muab Vaajtswv txujlug rua cov txivtsev. Cov txivtsev muaj dlejnum khuam cheem lawm kuj tsi muaj coob leej tuaj koom tau. Peb muaj 5 tug txivtsev hab 4 tug quaspuj.

Nub dimanche kuj muaj caij muab Vaajtswv txujlug rua pawg ntseeg kev pehawm. Thov peb cov pawg ntseeg thov Vaajtswv rua pawg ntseeg Arles nuav hab. Vim puab nyob dleb ntawm peb cov pawg ntseeg qaum teb nuav heev, kev sispaab tsi tshua yoojyim. Thaaj chaw nuav muaj tsuv muaj maa coob heev, yog peb tsi paab thov Vaajtswv hab nqeg moog paab puab. Nyob tsaam puab yuav nrhav tsi tau kev tawm.
Cov tswvcuab feem coob yog ua teb xwb ces tsi yoojyim rua puab tuaj moog koom kev pehawm Vaajtswv pistsawg. Kuj hlub puab kawg.