dimanche 24 mai 2009

Txug txhua pawg ntseeg

nyob zoo cov thawj txwjlaug ntawm txhua pawg ntseeg,

Kuv zoo sab tau tuaj ntsib mej ntawm lub blog nuav, thov qha rua mej cov txwjlaug txhua pawg ntseeg paub hastas, peb cov tsaavxwm tau qheb lub blog nuav rua peb kev ua dlejnum hab kev tshaabxu ntawm peb HKTF.

Yog mej leejtwg xaav paub hastas cov dlejnum HKTF yuav ua muaj dlaabtsi ces mej moog saib nyob rua huv nuav." ktf-covntseeg.blogspot.com "

Yog mej xaav sau ntawv los xaa xuv rua kuv ces xaa rua: " ktfcovntseeg@gmail.com "

Kl. Txooj Neeb Vaaj

Dlejnum taabtom npaaj

Thov qha rua peb cov Txivtsev paub hastas, kuv nrug rua cov tsaavxwm, peb tseem taabtom npaaj tej ntaub ntawv kawm rua peb cov txivtsev. Yogle txha tsi tau muaj caij tuaj ntsib mej txhua pawg ntseeg.

Kuv dlejnum kuj ntau, tej zag xyoo 2009 nuav kuv yuav nrhav caij tuaj saib mej, tuaj nrug mej sisthaam saib peb yuav sis paab ua dlejnum lecaag xwb. Teg dlejnum kev cobqha, kev kawm kuv nrug rua cov tsaavxwm peb npaaj rua xyoo 2010 kuas muaj kev kawm ntawm peb cov pawg ntseeg.

Hab npaaj lub rooj cobqha peb cov txivtsev hab namtsev rua lub 5 hlis tim 22-24/05/2010 yog hastas npaaj tau lawvle lub sab xaav.

Muaj dlaabtsi maam qha rua mej paub.

Kl.Txooj Neeb Vaaj

samedi 23 mai 2009

Cov Naxales Tsi Fwm Yexus

Peb muaj tug cwjpwm kws tsi tshua fwm tug tuabneeg kws peb paub zoo. Kuv muab sojntsuam, peb cov pawg ntseeg muaj tug cwjpwm zoo le Tswv Yexus tsev neeg kws puab paub Yexus zoo dlhau ces puab txawm tsi fwm Yexus.

Malakaus 6 :1-4 Yexus txawm tawm qhov ntawd rovqaab moog rua huv nwg lub nroog (Naxales) nwg cov thwjtim nrug nwg moog hab. Nub Xanpatus Yexus moog qha huv tsev saablaaj. Cov tuabneeg coob-coob kws noog Yexus qha xaav tsi thoob le. Puab sisthaam hasta :

· Nwg tau tej nuav qhov twg lug ?

· Lub Tswvyim kws nwg tau nuav yog Tswvyim dlaabtsi ?

· Nwg ua lecaag ua tau tej txujci tseemceeb ntawd ?

· Nwg puas yog ibtug kwsntoo kws yog Malis tug TUB, hab Yakaupaus, Yauxej, Yudas, hab Ximon puab puas yog nwg cov kwv ?

· Hab puas yog nwg cov muam nrug peb nyob ntawm nuav ?

Yexus has rua puab hastas, « Tej tuabneeg ob caag puavleej FWM tug cev Vaajtswv lug, tsuas yog cov tuabneeg kws nyob huv nwg lub zog, nwg cov kwvtij hab nwg cov tuabneeg txha tsi FWM nwg xwb.»

Yexus hlub nwg lub zog, vim muaj nwg tsev tuabneeg, cov kwvtij, cov nkauj cov muam, cov txheeb cov ze coob leej kws tsi tau paub hastas Yexus yog leejtwg tag. Nwg txha txav txim sab moog qha rua puab kuas puab paub hastas cov Yixalayees muaj ibtug Vaajxwv lawm tag. Tabsis thaus Yexus moog txug huv nwg lub zog, cov tuabneeg nyob huv TSI FWM NWG.

Nyob rua peb tej pawg ntseeg, peb muaj tej tug xwbfwb, tej tug txwjlaug hlub Vaajtswv heev, txawj qhuabqha, xaav coj pawg ntseeg moog cuag Vaajtswv, tabsis coob tug ntseeg tsi fwm puab. Vim puab paub cov tuabneeg ntawd zoo heev,ua rua puab tsi qaab sab ua Vaajtswv dlejnum.

Yog muab saib, cov tuabneeg Naxales yeej tsi paub Yexus zoo, puab txha tsi Fwm Yexus, peb pum tomqaab nuav Yexus tug kwv Yakaunpaus dlhau lug ua ib tug thawj Txwjlaug khov kho nyob huv nroog Yeluxalees, thaus nuav Yakaunpau lub qhov muag maam pum meej paub tseeb hastas yaav taag lug nwg tseem pum Yexus tsi tau meej, tsi tau paub Yexus zoo.

Kuv xaav hastas thaus peb tsi fwm ib tug xwbfwb losis ibtug thawjcoj huv peb pawg ntseeg tsi yog peb paub nwg zoo dlhau, tabsis qhov tseeb peb tseem tsi tau paub nwg hlo le. Yog peb tub tsi fwm tug kws peb qhov pum, peb yuav tsi fwm tug peb qhov muag tsi pum kws yog Tswv Yexus.

Vaajtswv yog tug tsaa cov xwbfwb, cov thawjcoj lug saib pawg ntseeg, peb yuav tau fwm puab zoo le Vaajtswv ibtug tub qhe, qhov nuav yuav ua rua puab kub sab ua Vaajtswv dlejnum. Tomqaab Yakaunpau dlhau lug ua thawj txwjlaug lawm, nwg txha sau nwg tsaab ntawv xaa rua txhua tug ntseeg thoob qaabntuj txug tej yaam kws peb yuav tau hloov xwsle: kev npluanuj hab kev pluag, kevsim sab, kev ua yamntxwv zoo, kev xaiv ntsej muag, kev ntseeg hab kev ua dlejnum,, tug nplaig kws has tej lug phem hab lub tswvyim, kev muab hlub hab kev txu fwjchim.

Yog hastas nyob huv peb tej pawg ntseeg suavdlawg pum le Yakaunpau has ntawd ces pawg ntseeg yuav rov cajsa, Vaajtswv teg dlejnum yuav luj nthuav dlaav, xaav kuas peb pum le Yakaunpau, hloov dluab sab, tig rov lug pum Tswv Yexus ua qhov tseebceeb, fwm yug cov thawjcoj, txhawb puab, has lug zoo rua puab, caw puab tuaj nrug yug nojmov uake kuas paub puab zoo dlua qub.

Kl. Txoooj Neeb Vaaj